بما ان الشرع حلل اربع حريم حق الرجال فا شرع الحكومة من بعد جلسة الاستجواب وجلسة عدم التعاون حلل اربع سنين عسل وحلوين على قلب النواب الانبطاحيين والبصامه والمتخاذلين عن كلمة الحق وضميرهم اللي طار مع اول نسمة هواء ملوث داخل قاعة عبدالله السالم .
ولكن شنو بعد الاربع سنين يانواب مصيركم تردون حق صناديق الانتخابات . انحاشوا منها الحين في التبصيم والانبطاح وغيره من اشكال التهرب . بس راجعين راجعين حق يوم الاقتراع ووقتها راح نذكر كل متخاذل فيكم بيومين 8\12 ويوم 16\12 ومواقفكم فيهم وتناقضاتكم فيهم وانكم بديتوا مصالحكم على مصالح البلد ....
وللاسف لعبة القروض وغيرها من الماديات علشان تردون شعبيتكم واللي شي اكيد بتساعدكم فيها الحكومة لانه مامر عليها بحياتها مجلس حبوب ويسمع الكلام كثر هالمجلس ماراح تمشي وتعدي واذا بتمشي يمكن على جم واحد مسكين منخدع ومايدري انكم شريتوا القروض وغيرها ببيع البلد ...
ولا عزاء لراي الشعب اذا كانت نوابه بصامه ومتخاذله . وانا مالوم النواب بس الوم اللي وصلهم وانا منهم اللوم نفسي من يوم 8\12 الى اليوم .
وياعلي الراشد ماعندي غير هالقول للتابعي .
استكثر من الإخوان ما استطعت، فإن استغنيت عنهم لم يضروك، وإن احتجت إليهم نفعوك ..!!
علامة استفهام :
النائب صالح الملا انت اخر واحد كنا نتوقع منك هذا الموقف المخزي وصمتك عن الحق وانت اللي كنت دايم تنادي فيه . هالمره شنو تبي تسوى علشان تسكت صراخ المدونات والمنتديات عليك تبي تناديهم وتجتمع فيهم علشان تقنعهم وكل شي كان واضح وتحركاتكم واضحه ...؟!
النائب صالح الملا انت اخر واحد كنا نتوقع منك هذا الموقف المخزي وصمتك عن الحق وانت اللي كنت دايم تنادي فيه . هالمره شنو تبي تسوى علشان تسكت صراخ المدونات والمنتديات عليك تبي تناديهم وتجتمع فيهم علشان تقنعهم وكل شي كان واضح وتحركاتكم واضحه ...؟!
اقتراح اخير :
اتمنى من الحكومة بما انه سكوب والعداله وباقي شلة الاعلام التعيس مسوينها يوم الانتصار ويوم الفتح العظيم وعاش الرئيس ومات حاسدوه .
نبي يوم 16\12 يوم عطلة رسمية نحتفل فيه بيوم الانتصار العظيم ويوم تحطيم ابناء الشعب الطامع في الاسره حسب راي الاعلام المطبل ونطلع وياكم مسيرة بقيادة كبير المنافقين ملهب الجماهير بوصادق .
من مدونة الاخ العزيز حاكي عقالي
