الأربعاء، 24 نوفمبر 2010

بغض النظر ؟!

بغض النظر عن ابو الفهود وتنميتة الفاضيه وتقريره اللي حق ذر الرماد في العيون واللي حتى و لاول مره تجار الكويت الجشعين مايحوشهم شي منها !!!

وبغض النظر عن هتلر الكويت وطنازة خلود عليه والثاني مستانس انه صار اضحكوه وملطشه وكتابه اللي كان محذوف عندي من 3 سنوات واشوه انه ببلاش يايني منه لانه مايسوى حتى اخلي بنتي تشخبط عليه !!

وبغض النظر عن ان مجلس الامه صار وجوده مثل عدمه وصار لعبه بيد مجلس الوزراء ورئيسة حبيب الشوكولا والدول الفقيره ودافع الجزيه بزياده حق الام المتحدة يعني شوفوني ترى انا زنقيل من اموال الشعب !!

وبغض النظر عن رئيس وزرائنا الطيب الحبيب بودشداشه زري شغل ايد مو اي شي وسالفته مع فتح سفارات حق دول مو موجوده على اي خريطة بالعالم او في اطلس الدول ولا فوقها يتعهد لهم انه الحكومة تدفع لهم رواتبهم وكسوتهم وكل شي من الى والله زين يارب بيوم نكون مواطنين من هذي الدول جود يحوشنا طشارطيب من سمو الرئيس !!

وبغض النظر عن طلال الفهد واخوه احمد اللي سبحانك يارب يشاركون تحت العالم الالومبي في الاسياد وبكاس الخليج تحت الكويتي شلون صايره الحقاره وذل الكويت ؟!

وبغض النظر عن المسيو المهري الوكيل الحصري للمراجع وصاحب الفاكس العظيم يتكلم عن تعديل الدستور مادري وين تصير هذي بس يله الكل حكومي ويحق له !!

وبغض النظر عن رئيس وزرائنا الموقر اللي صار يدور العطل والاجازات اكثر من الموظفين البسطاء وبين كل عطله وعطله ياخذ له عطله يتسيح فيها !!

وبغض النظر عن موضوع هايف واللي متوسط له واللي ماندري صج او جذب وبعدها طلع لنا هايف في حركه تغلي وهي هذي اخر دورة لي ياريت والله واخذ وياك القلاف بيدك وبطريجك درب السلامة .


وبغض النظر عن استجواب وزيرة التربيه اللي اتوقع اخرتها بتعرف الطريج الى قلوب بعض نواب الدوائر الخارجية بالذات واهم بسرعه يسكتون على شوية تعيينات وشوية مناصب راح تلقاهم يقولون لها حاضر يافندم .

وبغض النظر عن اعداد الوافدين اللي فجاة زادت بقدرة قادر وبالذات مع تصريح وزراة الشئون ان التصاريح موقوفه انزين شلون زاد عددهم يعني داخلين تهريب ؟!

وبغض النظر ان حرامي الناقلات وولده ولد ميري صاروا يتكلمون عن الشرف ويزرعون القيم والبذرة الحميده والاخلاق المستقيمه والفضيلة طبعا فضيلتهم مثل فضيلة روسيات دبي !!

وبغض النظر عن بودي وجريدته بتاعت اللحوم الفاسده واللي صارت اخبارها بس عن المواد الغذائية واللحوم وناشر كل المحررين عنده بس في الاسواق ماكو شغل يبا عطوه المناقصه وفكونا !!

وبغض النظر عن الوعلان وسياسته فرق تسد حق صفر حرام و حق الساير حلال والاثنين قاموا بنفس الاجراءات بس الحب مشكلة !!

وبغض النظر ان فؤاد الهاشم بدون سابق انذار صار عدو للسفارة الامريكيه وطايح ذم فيها الظاهر والله اعلم دعم الاعلاف المخصص له وقف !!

وبغض النظر عن موضوع الجاسم والحبس سنه ووناسة تيلفون العملة واللي صرح قبل النطق الرسمي من قبل المحكمه في الحكم واثناء المداولة النهائية وهذي يبطل الحكم بكبره رقعها ياعماد !!

وبغض النظر عن صفقة طائرتين الشحن السكراب اللي مستذبح عليها النائب الاول وقاعد يحاول يقط مسئوليتها على رئيس الوزراء علشان يكون بعيد ويرجع سالم !!

وبغض النظر عن سكوت وبلع العافيه لجمعية الصحافيين وجمعية المحامين عن موضوع الجاسم واهو صحفي ومحامي وللعلم الاولى فايدتها ووجودها حق دفتر الخصومات الوهمي و حق شرب الشيشه واكل الشاورما والثانيه حق تأجير صالة المبنى عندهم وبيع الحجي !!

وبغض النظر عن تقرير الخارجية الامريكية عن (الديانة) الشيعيه في الكويت والعجيب تصدي حدس والخرافي للرد على ادعاءاتهم معنهم يدرون انه فيه من كلامهم شي واقعي !!

وبغض النظر عن ان الدكتور عمران القراشي للحين نايم في مستشفى الطب النفسي من يوم 29\10\2010 وماخلوه حتى يعيد مع اهله الله يفك اسره !!

وبغض النظر عن موضوع الاحمدي والغاز والحل الترقيعي واللجنة اللي شكلوها وياكثر زحمة اللجان عندنا على الفاضي واخرهم لجنة مشرف اللي محد يدري عنها شي ولا حاسبو حتى القطو اللي نايم فوق الحاوية اللي يم المحطه !!




السؤال الاهم والمهم عندي ليش حكومة دولة الكويت ورئيسها يكرهون الشعب الكويتي ويحاربونه باي طريقة و بأي الية عندهم هذا السؤال محيرني واتمنى بيوم الاقي له جواب ؟؟