الاثنين، 20 سبتمبر 2010

الورقة الخاسره ونتايجها القريبه وفرد العضلات !!!

في خطوة لنزع فتيل الأزمة، قرر مجلس الوزراء خلال جلسته اليوم سحب جنسية المدعو ياسر الحبيب، وجاء القرار بعد تأكد مجلس الوزراء من امتلاك الحبيب جواز سفر دولة أخرى ولجوئه إلى دولة أجنبية-بريطانيا.
حذرنا وتكلمنا وايد عن هذا الموضوع وخطورته ياناس ياعالم سحب او اسقاط الجنسية خطأ كبير كلنا ضد ماقاله الخبيث واسأته الى ام المؤمنين رضي الله عنها ولكن ضد سحب الجنسية من ياسر او غير ياسر سني . شيعي . بدوي . حضري
و اتوقع خلال الفتره الجايه راح تكون ورقة كبيره بيد الحكومة تسحب جنسية من تبي وتخلي اللي تبيه وبمباركه نواب الامه اللي مفروض عارفين اللعبه وتبعاتها وبالذات نواب القبائل اللي المفروض منتبهين لنقطه مهمه من اسباب سحب الجنسية وهي امتلاكه جواز سفر اخر هذي النقطه اللي راح تلعب فيها الحكومة مع نواب القبائل وراح تكون اكبر ورقة ضغط عليهم ولكن لكل داء دواء يستطب به إلا الحماقة أعيت من يداويها , رفعوا الحرج عن نفسهم جدام ناخبينهم من المنجرين وراء الفتنه واللي يدافعون عن ام المؤمنين رضي الله عنها بجهاله مع بعض المتكسبين على عرض الرسول عليه الصلاة والسلام من امثال حدس واحياء التراث والبذالي والشليمي و تجمع ثوابت الشيعه والقلاف وداسوا على انفسهم قبل غيرهم بجعل الجنسية لعبه بيد السلطه !!!!
كنت اتمنى من نواب التكسب تكملة طريقهم وكشف منو اللي دس اسم ياسر في كشف العفو الاميري وكشف من اللي هربه ومحاكمتهم جدام الشعب وكنت اتمنى من الحكومة مطالبة السلطات البريطانيه تسليم ياسر للكويت بحكم انه مطلوب بعدة قضايا صادر فيها احكام واجبة التنفيذ قبل سحب جنسيته !!!
===============================
نيي على الخبر الثاني اللي فيه من فرد العضلات الحكومية : جددت وزارة الداخلية تأكيدها على حظر اي موكب او تظاهرة او تجمع في الشوارع والميادين العامة والتي يزيد فيها عدد المشاركين على عشرين شخصا.
طبعا العميد الرويح خلط الشامي على المغربي في تصريحه ودخل مواد واستثنى ثانيه على منو تضحكون ياوزارة الداخليه قانون غير دستوري المحكمه الدستوريه الغته هذا والله قمة الالتفاف على الدستور ومواده !!!
وعلي اساس تمنعون اي تجمع سلمي ؟!
شخصيا ضد التجمعات اللي من وراها فتنه مثل تجمع حدس والتجمع المضاد له واقول تحرك الحكومة سليم , ولكن هم ضد اعادة فرض قانون انسفته المحكمه الدستوريه واللي فيه موضوع 20 شخص فما فوق وموضوع الاذن الرسمي من السلطات اللي قاعده الداخليه تستثنيه من الحكم الصادر ضد تقييد حريات الشعب وبصراحه انا ماني عارف شنو دور نواب الكتل الوطنيه او اللي يسمون نفسهم جذيه واللي كل ماحاشهم طشار من شي قالوا الدستور والدستور ماشي هذا هو الدستور قاعد يفرغ من محتواه ويتم تقيد حريات الشعب وينكم ؟؟ عليكم دور في الدفاع عن حريات المواطن والشعب عليكم يانواب التكتلات الوطنيه دور في عدم والسكوت عن هذي المهزله واللي يراد منها المستقبل القريب مو الوضع الحالي التعيس !!!
وبعد الوضع الحالي المزري ما استغرب من انه يعلق الدستور عن قريب ويفرض قانون الاحكام العرفية دام النواب نايمين في العسل وبس همهم يرفعون الحرج عن نفسهم ونسوا دورهم الاساسي وهو التشريع و الدفاع عن الدستور والحريات !!!

هناك 10 تعليقات:

ناقد سياسي يقول...

اخوي صاحب المدونة اتمنى تجاوبني على سؤالي وماتشطب التعليقحرصا على الشفافيه في مدونتك
اخوي انت معترض على سحب جنسية المدعو ياسر حبيب ؟
عشان هالشي سيادي صح
عشان هالشي مايصير ادات ضغط صح ؟
وينك ماتكلمت لما انسحبت جنسية المدعو خالدالمريخي ؟؟
ليش ماكتبت ان هالشي خطير ؟
ليش ماقلت غلط وحذرت ؟
ليش ماحطيت بوست عن الكلام الي قاله التافه ياسر حبيب استنكرت ؟
ليش لما هاجم التافه البذالي نواب الشيعه علقت عليه وقلت زمان الرويبضه؟
هذي شنو اسميها طائفيه ولا طاف ؟
انا ضد التافه البذالي والتافه المريخي والمنحط ياسر
بس ابي تجاوبني برحابت صدر وتفند اسئلتي اذا ممكن

الراية يقول...

وينك ماتكلمت لما انسحبت جنسية المدعو خالدالمريخي ؟؟

نا اقولك واجاوبك على خلط الاوراق اللي داخل فيه المريخي شخص تافهه قط الجنسية وقال انا متنازل عنها واهان الجنسية الكويتية هل تبيني ادافع عن شخص اهان دولتي وجنسيتها اللي اهو موكفو يحملها وقام يذم فيها ويمدح في دولة ثانيه وبحكامها لا والله مادافع ولا راح ادافع عن اشخاص جذيه اهم قطوا الجنسيه من نفسهم ومانسحبت منهم او اسقطت

واعطيك علم انا معارض من قبل من على ايام سليمان بوغيث وخطا اسقاط الجنسية عنه والمبدا واحد والحمد الله


ليش ماحطيت بوست عن الكلام الي قاله التافه ياسر حبيب استنكرت ؟

على ما اظن انك قريت البوست السابق وقريت اني مستنكر فيه وذاكر فيه استنكاري عن كلام المدعو ياسر الخبيث وعن سبه وشتمه ام المؤمنين رضي الله عنها


ليش لما هاجم التافه البذالي نواب الشيعه علقت عليه وقلت زمان الرويبضه؟

ارد واقولك انت قريت البوست السابق انا مادافعت عن اي نائب شيعي كل واحد فيهم له لسان شطوله يدافع عن نفسه انا دافعت عن اخوانا الشيعه وحرية المعتقد وعدم سبهم او لعنهم واطروحات التافه البذالي وتناقضاته التامه


هذي شنو اسميها طائفيه ولا طاف ؟

شنو انت تحب تسميها اخوي سميها براحتك والحمد الله اللي يعرفني من المدونين يعرف اني موطائفي ولا عنصري :)

انا جاوبتك بصراحه انت جاوبني بصراحه شنو مزعلك من البوست علشان قلنا سحب الجنسيه خطا ولا علشان قلنا حدس حركة التكسب ؟؟؟

الراية يقول...

ونسيت اوضح شغله لك انا ترى في البوست الاخير طالبت بسحب يار ومحاكمته في الكويت وبعدها سحبوا جنسيته كل هذا وبنظرك مادافعت شنو الدفاع عندك ؟؟؟

ناقد سياسي يقول...

شكرا لرحابت صدرك
لاكن اسمحلي اني اعلق على اجوبتك
1- انت تقول انا ما ادافع عن واحد اهان دولتك وجنسيتها ذم دولتنا عدل ؟
ليش عيل تقول ان سحب جنسية ياسر غلط انت دافعت عن هالشغل صح ؟
لاكن التافه المريخي اهان دولتنا بس ال.... غلط في عرض رسول الله السيدة عائشه واتهمها بشغلات مااقدر اقولها ؟
انت متناقض اسمحلي جاوبني وابي مقارنه بين انك ماتدافع عن واحداهان دولة وواحد كفر ام المؤمنين ؟؟؟
2- انت نزلت بوست كامل عن البذالي وستنكرت كلامه ليش مانزلت بوست عن ياسر ؟
3- انت تقول ان انا زعلان عشان قلت حدس حركت تكسب لا انا بزيدك حدس حركت جمبازيه ودجالين وعندي انا ان حدس ارفع من مستوى ياسر حبيب بشبر.
كنت اتمنى انهم يسوون ندوتهم ويرشونهم بماي حار وفيه نير ومعبوج
عشان اجيبها معاك للاخر
مايشرفني ان احد يلمح شوف يلمح اني من ابواق حدس
التكتل الشعبي شغلات واجد موعاجبتني فيه
تحالف الوطني مو عاجبني
ولاني من فداويت رئيس المجلس
ولاني مزدوج
انا كويتي ومثل نفسي وحر بريايي :)
وانا الي فهمته انك سني يليت تصلحلي المعلومه

مدونة الكويت ثم الكويت يقول...

الراية الفاضل


مقال ممتاز وللأسف أن قرار سحب الجنسية لم يأتي من الحكومة ولا بقناعاتها إنما جاء ( كالعادة ) بالفرض هي كذلك حكومتنا افرض واضغط عليها تستجيب وترتعد ؟

أما بشأن أنها ورقة ضغط في المستقبل بما يخص ملف الإزدواجية فأنا أختلف معك بأنها لو كانت حكومة قوية بالأساس لصدقت وجهت نظرك ولكن التاريخ والواقع يقول :
كانت ولا تزال وسوف تبقى كل الحكومات الكويتية حكومات ضعيفة .

يا الحبيب محد راضي يعترف إن الكويت فشلت بالديموقراطية فلا اهم راضين يطورون الدستور ولا اهم راضين يحترمون الدستور ولا اهم راضين يحترمون القوانين بالنهاية الضحية الكويت وأهلها .

الله يستر من اللي ياينا بس

تحياتي

الراية يقول...

1- انت تقول انا ما ادافع عن واحد اهان دولتك وجنسيتها ذم دولتنا عدل ؟
ليش عيل تقول ان سحب جنسية ياسر غلط انت دافعت عن هالشغل صح ؟

اخوي شنو اللي تبي توصل له بصراحه في هذا السؤال انك تقول ياسر اهان اللي اكبر من لدولة اخوي احنا دولة مدنية مودينية هذا توضيح ثاني شي انا مادافعت عن ياسر ولا يشرفني ادافع عنه او عن غيره يسيئون للدين وولرسول وزوجاته انا دافعت عن المبدا وهو موضوع الجنسية ماتكون لعبه بيد السلطه وماتصير سابقه وقلتها في البوست ما اتمنى الاستعجال في سحب الجناسي وهذا اكبر خطا يرتكبونه اعضاء مجلس الامه بتحريضهم المباشر على هذا الموضوع

لاكن التافه المريخي اهان دولتنا بس ال.... غلط في عرض رسول الله السيدة عائشه واتهمها بشغلات مااقدر اقولها ؟


المريخي اهو طلع وتنازل ياخوي ليش تخلط الامور جزاك الله خير الريال قال مابي جنسيتكم وانا متنازل عنها ترى وايد تفرق عن ياسر وبوغيث وياسر ارد اقولك المدبا ياصديقي قوانين البلد قوانين مدنية سواء قوانين الدستوريه او قوانين الجزاء واا قريت قرار سحب الجنسية اخوي لاحظ انها سحبت بسبب الازدواج مو بسبب شتم عرض الرسول عليه افضل الصلاة لانه مافي ماده او نص في قانون الجنسية تسمح بسحب الجنسية لاسباب دينية ومافي ذكر حق الدين الا في مادة وحده وهي المادة الرابعه وشروطها وهي ان يكون مسلما


2- انت نزلت بوست كامل عن البذالي وستنكرت كلامه ليش مانزلت بوست عن ياسر ؟


علي ما اظن جاوبتك وقلت لمك اني استنكرت كلامه في بوستين

وانا الي فهمته انك سني يليت تصلحلي المعلومه

قبل لا اكون سني انا كويتي وتهمني وحدتها وتهمني انه الشيعه والسنه مايمزقونها في طائفيتهم اللي تاخر ماتقدم وشكرا

الراية يقول...

الزميل العزيز مدونة الكويت ثم الكويت

ادري انه الحكومة هذي مسيره وةمومخيره ومافيها خير ياخوي بس راح تكون ورقة ضغط بحالتين صاحبنا اللانابه يصير في الاصاله , و في المواقف المستقبليه وبالذات الاستجوابات اللي فيها تكتل قبلي كبير راح تكون ورقة ضغط نفس الفتره اللي فاتت

ولا احد راح يعترف يالزميل وياخوفي مانسلم حتى على الدستور بعد فتره بسيطه اذا هذي العقليات الحكومية والنيابيه لانبي تطويره ولا اي شي غير انه يبقى سالم وبعيد عن عبثهم الكامل فيه

خالف تعرف يقول...

لابد من اخضاع القانون لغربله
وانتزاعه من حضن اعمال السيادة وعرض مسائله على القضاء

الراية يقول...

خااالف تعرف

اتمنى بخصوص شق واحد فقط هذا الشي وهو سحب او اسقاط الجنسيه علشان لاتكون لعبه بيدهم و نصير حتى نخاف نقول شلونك وزير

الموسوعة الحرة يقول...

تحية طيبة...
ارفق لك طيا هذا الرابط الحاوي لمقال موضوعي حول تلك القضية...اذا لم يعمل الرابط اخبرني كي ارسله بطريقة اخرى...
http://www.burathanews.com/news_article_105049.html
تحياتي الطيبة...