وزير الفستق والمعازيب !!!

كلمن ياخذ امي يصير عمي هذي المقولة طبقها وزير الفستق روضان الروضان حرفيا في تصريحه الاخير ضد المرشح الفاشل خالد الشليمي وتعرضه للنائب الاول ووزير الدفاع وتذكيره في انه بيوم من الايام وقف في وجه الصامدين من الشعب الكويتي ايام الغزو العراقي وقولة ان الصامدين خونه !!!

علي اي اساس واي ماده في الدستور يالروضان صرحت ان النائب الاول رمز لا يكون على المادة 54 من الدستور اللي عطت الحصانه والرمزيه لسمو الامير وحده من دون سواه او لا يكون شايفنا مدمغين وشعب مساح جوخ مثلك كل ما مسك احد رئاسة الوزارء قلت له انت عمي وعم الكل !!!

الظاهر مع الوقت راح ترجع الحمله القديمة وهي اضافة الخطوط الحمراء والرمزيه حق اللي تبيه الحكومة وبجميع اشكال القمع للاسف صارت الكويت بلد الخطوط الحمراء والله يستر من اللي ياي !!!

================================

نيي على موضوع معرض الكتاب واللي تكلموا فيه اخواني المدونين وماقصروا لي متى يتم مصادرة الراي ليش هذا التخلف اللي حاصل عندنا ويبون يرجعونا لزمان مصادرة الحريات وانا حر في اللي اقراه محد له رقابه علي او على اللي اقراه ومالوم المثقفين اللي امتنعوا عن المشاركه في معرض مسلوب الاراده والفكر معرض المفروض يبيعون فيه قرطاسيه وكشاكيل وبرايات ابرك من انه يكون مناره ثقافيه للاسف الحكومة بدات من فتره تحابي الاسلاميين وغيرهم من دعاة التخلف على حساب الثقافه والعلم !!!

===============================

كل الشكر للقائمين على حملة خلوها تخيس واعلن تضامني معاكم واشد على ايدكم وادعوا الكل الانضمام لهم والمقاطعه عندي بدات من شفت سعر كرتون الطماط وصل 5 دنانير وشفت كرتون الثوم وصل سعره 2.5 دينار !!!

واتمنى المقاطعه تشمل حتى المنتجات الاستهلاكيه اللي سعرها صار نار ويحرق جيب ارباب الاسر اللي كل يوم تيهم صفعه جديده من الحكومة الضعيفه ووزير تجارتها السيد ماري انطوانيت الهارون وتصريحاته اللي لاتغني ولا تسمن من جوع !!!

احذري ياحكومه وياوزير تجارتها فا الشعوب دائما لاتثور الا عندما يقترب أحد من لقمة العيش فهذا هو الخط الأحمر ومصطلحكم الجديد السكين وصلت للعظم بدا ياكل الشعب والمواطنين بسبب التجار وجشعهم واطماعهم في رواتب الناس عدت مرحلة العظم وبدات تبتر اللحم والاعضاء ....