السبت، 13 نوفمبر 2010

اليوم اولمبي باجر شنو ؟!


مؤسف بصراحه اللي شفناة امس في حفل افتتاح دورة الألعاب الآسيوية واللي صار فيه هل لهذي الدرجة احمد وطلال يبون يذلون الكويت علم راحت بالدفاع عنه انفس واستشهد له خيره شباب الكويت للدفاع عن ارضه وكان واولهم ابوك يا احمد فهد الاحمد والله العظيم عيب الحين عرفنا تصريح احمد الفهد موتوا قهر فعلا متنى قهر يا احمد ولكن ان لم تستح فافعل ماشئت مو لازم يا احمد تشارك وانت موقوف ليش تبي تشارك علشان تذل بلدك وتحقر فيها يا احمد ولا علشان تاخذ جم ميدالية وتقول حق اللي اعلى منك شوفوا احنا سوينا مع الايقاف !!

هذا موفخر يا احمد هذا ذل حق الكويت وعلمها وشعبها انا مادري مافيه حكومة توقف احمد وطلال عند حدها مافي حكومة تقول لهم عيب اللي قاعد يصير انا مع الاخ المدون le Koweit يوم قال حكومة الكويت ليست كويتية نعم فعلا لانها لو فيها ذرة من الوطنية ماترضى باللي حاصل من مهازل و ومنها هذي المهزلة القذرة واللي تدل على محاولة اذلال البلد باي طريقة كانت وعلى حساب مصالح وتكسبات شخصيه ؟!

اتمنى وياريت والله بما انه الحكومة رضت ان يشاركون ابنائها تحت علم غير دولتهم وتحت المظلة الاولمبية يكملونها ويرضون ان نكون تحت مظلة اي جهة دولية تعين لنا اعضاء حكومة يكونون قد مناصبهم ومايفرطون بكرامة دولتهم على حساب مصالحهم وتلميع نفسهم ؟!

ووينك تو الناس ياصالح صباح الليل توك تدري انهم رايحين ومنصدم سلامتك من الصدمة حروبكم انتوا وطلال هالمره تعدت مرحلة تخريب الرياضة الا صارت ذل الكويت واهلها وحط كرامتها صرح ياصالح انت كلام بس تبيعه مو خسران شي من كثر ماصرحت باستجواب الرياضة صرت فاقد المصداقيه بشكل كبير وحتى المينون ماقام يصدقك انت ومرزوق اللي مستعد يبيعك بارخص من التراب باقرب عرض يتقدم له !!

هناك 14 تعليقًا:

أهل شرق يقول...

الكويت صارت بدون ،، لا علم ولا اسم

الراية يقول...

أهل شرق

وقريب بدون شعب

الجودي يقول...

صج شي يحر

انقثيت أخاف علم الكويت جدام أنا ما شفت الإفتتاح :/

حسبي الله و نعم الوكيل

على إلي كان السبب

le Koweit يقول...

ايييه شنحجي شنقول بس
انشغلوا بخلافاتهم التافهة ونسوا الكويت ومصلحتها
هذه الصورة يحمل اثمها معسكر مرزوق ومعسكر طلال
كلهم تلطخت ايديهم بهذه الجريمة ...

عين بغزي يقول...

إنزين أخوي وين راح مرزوق الغانم ؟

ليش تحمل طرف و تترك الطرف الثاني الي بعد قاعد يساهم بطريقة او بأخرى في المشكلة ؟

الراية يقول...

الجودي

مافي علم حتى على ملابس الاعبين وممنوع ويتعرضون للايقاف

الراية يقول...

لو كويت

اكبر جريمة بحق البلد تطاحنهم ووجودهم في مراكز القرار اكبر خساره واولهم طلال اللي همه الترزز وبس

الراية يقول...

عين بغزي

موجود باخر البوست عيد القراءه اخوي وتلقاه مرتز يم صاحبه الاربعه ياعين بغزي نفس الشي خربوا الرياضه وقاعدين يحرقونها باي طريقة علشان شنو مصالحهم بس

هــديل يقول...

والــله لو فزت بالدنيا كلها..ما أرضى أنسب هذا الفوز بعد فضل الله سبحانه , إلا لديرتي..

عساني ما تكرمت بس ما أطلع إلا و يسبقني العلم ..

أحمد الله إن فيكم خير عسى الله يكثركم ..و يهزم الي ظلموا ديرتهم..
آميين..

Hope يقول...

آآآآه
تصدق من سنين و انا مالي بالرياضه الكويتيه
بكل بساطه فقدت الامل، و ما عدت اهتم
بس لما دريت عن سالفه العلم قلبي عورني.. مو بيدي غصباً عني
ليش ليش جذي؟
شهالاستخفاف.. والله حرام
كل يوم نقول ما يخالف تنحل ، ان شاء الله بتنحل.. بس وين؟ عيزنا منهم، محد هامه ولا انهزت فيهم شعره و علمنا غايب.. قهر
حسبي الله و نعم الوكيل

الراية يقول...

هديل

عيل انتي مومن ربع سياحه على ظهر الحكومة

الخير فيج اختي واللهم امين

الراية يقول...

Hope

والله اختي نفس الحال وولا مره تدخلت في شي رياضي لكن هالموضوع فعلا حارني والابلى اللي قاعد يتشدق فيه طلال انه لو الكويت مومشاركه تنشطب واهي شنو الحين وجودها مثل عدمها

الجودي يقول...

بعرف اللاعبين ليش مشاركين

تحت علم بوغايب مايصير بعد

فعلا شي غريب

كل عام وإنت بخير أخوي

و عساك من العايدين الفايزين إن شاء الله

الراية يقول...

الجودي

سياحه ولا غيرها فقط منو اللي تحصله سيحه على ظهر الحكومة وببلاش مع بوكت موني

وانتي بصحه وسلامه وعيدج مبارك